سياسة الخصوصية

آخر تحديث: ٢٦ أكتوبر ٢٠٢٦

Qme منصة تنظّم الدور في المطاعم والمقاهي والعيادات وغيرها: الضيف يمسح الكود، ويوصله تنبيه على جواله لما يجي دوره. يشغّل المنصة مؤسسة طريق البط للخدمات التسويقية (سجل تجاري 7040539624، الأحساء، المملكة العربية السعودية)، ونشار لها في هذي الصفحة بـ«نحن». نلتزم بنظام حماية البيانات الشخصية في المملكة ولوائحه.

١. ضيوف المنشآت

ما يحتاج الضيف يسجّل أو ينزّل تطبيق. اللي نحفظه:

بيانات الطلب: رقم الدور أو رقم الفاتورة، والمنشأة، وأوقات الانضمام والجاهزية والاستلام.
اشتراك التنبيهات: إذا سمحت بإشعارات المتصفح، نحفظ عنوان الاشتراك اللي يعطيه متصفحك عشان نرسل لك تنبيه طلبك فقط.
رقم الواتساب: فقط إذا اخترت «نبّهني بالواتساب» وأرسلت لنا الرسالة بنفسك. نستخدمه لتنبيه طلبك ذاك فقط، ولا نرسل عليه دعاية.
التقييم والملاحظة: إذا قيّمت زيارتك، يوصل التقييم وملاحظتك للمنشأة نفسها.

ما نطلب اسمك ولا بريدك، وما نستخدم ملفات تتبّع إعلانية.

٢. أصحاب المنشآت وفرقهم

بيانات الحساب: الاسم والبريد وكلمة المرور (محفوظة مشفّرة ولا نقدر نقرأها).
بيانات المنشأة: الاسم والرابط والشعار والإعدادات ورمز الفريق (محفوظ مشفّر).
الدفع: بيانات البطاقة تُدخل في نموذج شركة ميسّر المرخّصة من البنك المركزي السعودي، وما تمر على خوادمنا. نحفظ مبلغ العملية وحالتها ورقمها فقط.

٣. ليش نستخدم البيانات

تشغيل الدور وإرسال التنبيهات وعرض لوحة الفريق وشاشة الطلبات.
إعطاء المنشأة إحصائيات أدائها وتقييمات ضيوفها.
إدارة الاشتراكات والفواتير والتواصل مع أصحاب الحسابات بخصوص الخدمة.
حماية المنصة من إساءة الاستخدام.

ما نبيع البيانات ولا نشاركها لأغراض تسويقية.

٤. مين يشوف البيانات

المنشأة اللي زرتها تشوف طلبك وتقييمك. ونستعين بمزوّدي خدمة يعالجون البيانات نيابة عنّا وبحسب تعليماتنا فقط:

Supabase لقاعدة البيانات وتسجيل الدخول، وVercel لاستضافة الموقع. خوادمهم في مومباي بالهند، فالبيانات تُنقل خارج المملكة لهذا الغرض، مع ضمانات تعاقدية لحمايتها.
ميسّر لمعالجة المدفوعات.
Meta لرسائل الواتساب، لمن يختارها.
خدمة الإشعارات في متصفحك (Apple أو Google أو Mozilla) لتوصيل التنبيه.

وإذا اختار الضيف تقييم المنشأة على قوقل، ينتقل لصفحة قوقل مباشرة، وما نرسل لقوقل أي بيانات عنه.

٥. مدة الحفظ

رقم الواتساب واشتراك التنبيهات يُحذفون تلقائياً بعد ٣٠ يوماً من الطلب.
بيانات الطلبات والتقييمات تبقى للمنشأة ما دام حسابها فعّال، عشان إحصائياتها.
لما تُغلق المنشأة حسابها، نحذف بياناتها خلال ٣٠ يوماً، إلا اللي يلزمنا النظام نحتفظ فيه مثل سجلات الفواتير.

٦. الملفات المحفوظة في المتصفح

نستخدم ملف تعريف ضروري واحد لإبقاء الفريق داخل لوحته، وتخزين المتصفح لإبقاء صاحب الحساب مسجّل دخول. ما نستخدم ملفات تحليل ولا إعلانات.

٧. حماية البيانات

الاتصال مشفّر بالكامل، وكلمات المرور والرموز محفوظة مشفّرة، وقاعدة البيانات مقفلة إلا عن طريق خادمنا، ونقفل الدخول مؤقتاً بعد محاولات خاطئة متكررة.

٨. حقوقك

من حقك تعرف وش نحفظ عنك، وتطلب نسخة منه، أو تصحيحه، أو حذفه، أو تسحب موافقتك على التنبيهات بأي وقت. ولك حق تقديم شكوى للهيئة السعودية للبيانات والذكاء الاصطناعي (سدايا). راسلنا على creative@waystudio.net ونرد خلال ٣٠ يوماً.

إذا كانت بياناتك عند منشأة تستخدم Qme، تقدر تراسلها مباشرة أو تراسلنا ونوصل طلبك.

٩. التعديلات

إذا غيّرنا هذي السياسة نحدّث تاريخها أعلى الصفحة، وإذا كان التغيير جوهري نبلّغ أصحاب الحسابات بالبريد.